【《蘋果》專訪】早於90年出道的Face To Face，由吳少芳（Jodi）及蔡惠玲（Connie）組成，兩年出過三張唱片，包括《情迷Milano》、《一些》等K歌，惜Jodi於92年發生車禍致四肢癱瘓，人生亦從此改寫。組合解體後，Jodi和拍檔Connie一直保持聯絡，而曾任黎明、鄭秀文經理人的李進（Frankie），則成為她眼中大恩人。二人日前相約茶敍，Jodi指當年出事後，全賴Frankie替她處理保險賠償，現在才有安穩生活，因此全家人都很感激他。Jodi說：「上天關了我一道門，同時為我開啟一扇窗。」
「覺得會好番」
Jodi與輪椅為伴二十五年，沒自理能力，失去最在意的私隱，但她從沒想過要了結生命，Jodi帶笑說：「我由頭到尾都覺得會完全好番，冇諗過要死，因為16歲嗰年，我哥哥18歲撞車昏迷七日死咗，我好傷心，所以我嘅心態係唔可以令自己突然離開呢個世界，因為全家都會好傷心。」
思想正面的Jodi不時出席講座，希望帶出正能量，她說：「死好似好簡單，但唔死嘅話，有好多方法可以解決問題。」Jodi不諱言最初聽到治療師叫她揀輪椅，難受得哭了很久，她說：「見到人人出院都係借輪椅，我要買即係長用，不過我花咗兩日時間就接受咗。」
談家人哽咽
Jodi曾受訪講過為不想要家人勞心勞力照顧她，當年故意離家自住，身邊只有一個家傭照顧。每當提到家人，堅強如她也瞬即兩眼通紅，哽咽說：「最幸運係有家姐、妹妹關心，錢多有多使，少有少使，唔相信冇飯食。」問到可打算找個伴？她說：「隨緣啦！唔會搵，個天會安排，以前個天都畀咗好多我，但我冇好好珍惜，自己摧毀咗。唔會話唔要，但唔會刻意搵，都唔恨，而且都一個人生活咁耐。」
採訪：小米、懷鈺
攝影：陳慧安
場地提供：La Villa