特首梁振英就嚟卸任，一眾梁粉依依不捨，由梁粉搞嘅齊心基金會昨午舉辦「我和CY有個約會」，過百人出席同689講拜拜，當年押注CY嘅民建聯好捧場，前主席譚耀宗、現主席李慧琼、行會成員葉國謙等都有出席，忠實梁粉如紀文鳳、周融、高志森、劉炳章同馬恩國等又點會缺席？
書名《這個特首不太冷》
齊心基金仲整咗本書叫做《這個特首不太冷》，封面相片係喺度「調理農務」嘅689，入面有佢嘅BB相、學生同家庭照等。前特首董建華書中話自己比CY更嚴肅：「嚴肅有個好處，就是不講廢話，好多人誤會了梁先生，其實他做事深思熟慮，是個難得的好人。」又批評政府長期以來採取積極不干預政策，錯失機遇，為CY開脫：「我認為，這是梁特首最大掣肘。」
獲任中央政策組顧問嘅高靜芝就喺書中話689唔係狼、係謙謙君子，唔鬧人又唔黑面：「他一點也不狼，有時候，我們甚至恨不得他狼一些。」曾任CY競選辦主任兼行會成員羅范椒芬亦話梁特上場後有唔少掣肘，好似社會對人不對事嘅壞風氣等，一句講晒，唔關CY事。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk