公民黨立法會議員郭家麒醫生，平日喺議會炮轟庸官同保皇黨時用詞辛辣，又特別關心內地維權情況，原來同佢成長經歷不無關係。自細已係家中「大佬」，同父母、兩個妹妹同兩個弟弟住喺荃灣梨木樹邨，10歲已經幫爸爸手開辦館（即係早期嘅超級市場），經常要同街坊打交道，形成鍾意接觸巿民的性格。郭醫生回想當年，話𠵱家工作刻苦耐勞，真係要多謝爸爸當年訓練。
今年55歲的郭醫生，中學就讀葵涌中華基督教會全完中學，預科時轉讀九龍工業學校，其後考入香港大學醫學系。大學第一年人生首個旅行，郭醫生就用咗一個月，乘坐要喺車廂企足20、30個鐘嘅「硬座」（即係長途巴士），遊歷黃山，大學期間亦去過好多內地省巿旅行，包括山西、內蒙、東北三省等。
遊歷中國嘆現在差一萬倍
郭醫生話當年中國好窮，但啲人好友善，生活亦好樸素，同現時財大氣粗同貪腐問題更嚴重嘅中國好唔同，慨嘆今日嘅中國，較1980年時「差一萬倍」。
郭醫生話呀，自己嫉惡如仇嘅性格，細個時已經形成，雖然讀書成績理想，但從來唔係老師寵兒，皆因佢見到老師表現離譜，會夠膽直斥其非，面對權威亦唔會驚。
佢最深刻一次，係港大高桌晚餐請來時任布政司（即現時政務司司長）姬達爵士（Jack Cater）出席，佢期間企起身批評姬達嘅殖民地政策，不滿港英政府唔將中文使用合法化，鬧咗足足分幾鐘，要隔籬位宿友拉住先坐低。郭醫生話雖然姬達畀佢鬧足咁耐，但完全無黑面，仲好有耐性解釋自己立場，覺得當年官員內涵，的確比現時好好多。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk