大家知唔知香港嘅颱風信號，有百年歷史？查實俗稱「風球」嘅颱風信號最初係為方便航海人士而設，香港喺1917年首次使用數字颱風信號表示熱帶氣旋吹襲時嘅風向同風力，以便向市民發出警報，最初只得1至7號，𠵱家使用嘅信號系統就係1973年起採用至今。
紀念颱風信號100年
適逢今年係香港數字颱風信號誕生100年，香港郵政下月13日推出題為「數字颱風信號百周年」嘅紀念郵票同相關集郵品，一套5枚嘅郵票會展示數字颱風信號系統，特別之處係郵票上每個颱風信號都以凸字油墨印刷，手感特別。而郵票小型張嘅左方就會顯示香港天文台總部過去懸掛10號颶風信號嘅情景，右方則展示1917年、1931年同1973年香港採用嘅數字颱風信號系統，畀市民了解颱風信號嘅百年演變。
各郵局會喺本周三（31日）開始發售正式首日封，每個＄1.3；郵票同相關集郵品同日起喺郵政總局同多個郵局展出，詳情可以參閱網站 http://www.hongkongpost.hk 。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk