【本報訊】北京早前向民主派發還回鄉證釋出善意，而候任特首林鄭月娥也將爭取與民主派支持作目標，但民主派一直持觀望態度。自1989年六四事件後禁足內地的民主黨前主席劉慧卿接受本報訪問時表示，若林鄭月娥上任特首後一、兩個月能真正釋放善意、中聯辦不干預林鄭施政，她將考慮正式申請回鄉證到訪內地。
記者：林俊謙
劉慧卿除了2005年隨時任特首曾蔭權參與立法會內地訪問團外，自1989年六四事件後從未獲准踏足中國大陸，她多年來也一直就北京沒收民主派回鄉證問題，炮轟中國政府，雖然北京於去年11月底決定向民主派人士發還回鄉證，企圖以此與民主派緩和關係，但劉一直未有申請。
劉慧卿接受本報訪問時指，認要改善民主派與特區政府關係，中央對港政策要真正改變，就要給林鄭提供足夠自由度，中聯辦必須減少干預，而林鄭亦要與立法會各黨派溝通合作，就不同政策尋求共識，令政策在立法會通過，「如果乜都做唔到，唔同不同黨派溝通，一路鬧交，全部委員會都係親北京人士，咁即係中央對港政策冇改過，不論是否發還回鄉證也好，咁都好難搞」。
重啟政改要先建互信
劉慧卿認為若林鄭上場後真的可以改善社會氣氛，她直言會考慮正式申請回鄉證到內地，「我會唔會去，呢個我要睇吓佢（林鄭）呢一、兩個月發展係點樣，如果林鄭嗰度，真係可以自由去做嘢，我相信我哋去（大陸）係冇乜大問題，但如果情況好差，我哋自己就要再諗吓」，劉慧卿解釋，若社會氣氛好，「就算我哋去唔去大陸，啲人都未必有咁大抗拒，我現時又唔係民意代表，呢個係我權利，點解會唔去？」她強調，返回內地是每個香港人的權利。
對於重啟政改問題，劉慧卿坦言不期望林鄭上任特首兩、三個月即能重啟政改，認為最重要是先重建立社會互信，「即係做幾單嘢，真係交到功課，大家有份通過做到，做幾單醫療、教育又好」，當各方對林鄭信心增強，自然可以創造到個環境，「然後攞出政改喺立法會傾，係咪八三一乜都好，總之搵個方案，立法會議員可以傾，傾到50、60個議員都支持，然後叫政府交上去」，又強調政府在政改問題上不要單方面「作啲嘢」，「俾議員傾出方案，再叫政府交畀北京咁去做」。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk