早排傳前立法會議員謝偉銓有可能做下任發展局局長，引起官場及政界議論紛紛，雖然噚日又傳謝偉銓已經推咗唔做，但始終係傳傳吓，唔及佢本人親自答咁權威，所以佢前立法會戰友、財會主席陳健波就WhatsApp畀謝偉銓問個究竟。
話說噚日立會內會開始前，陳健波遞部手機畀坐佢前面嘅陳振英睇，現場嘅蘋果攝記梗係睇睇有乜咁好睇，原來係陳健波問謝偉銓係咪做局長，如果係佢就下個立法會期入發展事務委員會，撐硬老友！而謝偉銓冇直接答陳健波，只係話好懷念以前喺立法會嘅日子。
不過呢排官員、特首私下同議員溝通咁敏感，隨時又俾人話私通，陳健波仲話會為謝偉銓入發展事務委員會撐場，就難免會令人有猜測啦。
傳謝偉銓拒做
八方喺財委會會議中段休息時，問波哥為何在會議期間，問謝偉銓做唔做局長，會否擔心又被人話「私通」謝偉銓時，陳健波就話唔怕：「我寫到好明，係聽講你（謝偉銓）會做咩喎，我想問吓你係咪，如果係要撐你，老友記梗係咁講啦！有乜問題？我哋兩個私下對話，你班友自己報道咋嘛！又唔係揭露咗陳健波有蠱惑，益佢咩嘢吖嘛！」
陳健波坦言，唔知謝偉銓咁答係乜嘢意思，「有啲人解讀佢即係唔係（做局長）囉」，話經過今次事件，以後會加倍小心，「睇怕都要熄咗部機嘞」。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk
李八方