仲有兩個月就暑假喇，唔少讀緊書嘅大專生都忙於搵實習，八方就有筍工推介，民主黨嘅暑期實習計劃開始請人，佢哋仲拍咗條宣傳片講吓工作性質，雖然實習生時薪係40蚊連1,500蚊約滿津貼，算係不過不失，但係有更加吸引人嘅地方。
民主黨今年嘅實習計劃叫做「民主小茶飯」，佢哋搵嚟清純美女、2015年參加過實習嘅Sophia做代言人，講吓實習時要幫手設計地區海報、策劃活動、整埋文件、幫議員寫吓講稿、同埋處理市民求助等。
大家如果唔想錯過呢個實習機會嘅話，記得報名截止日期係今個月21號，而實習期就係下個月12號至8月9日，總時數係150個鐘，主要對象係大學生、大專生同應屆DSE畢業生。