張家輝多年來專心拍戲，一部電影片酬收約2,000萬元，豬籠入水買大屋，近年仲越買越豪，繼早年買入薄扶林貝沙灣，近年又買入跑馬地名校網嘅豪宅逸廬，最新消息指家輝以1.31億元，買咗中半山嘉慧園J座高層單位。
慳稅1,500萬元
中半山馬己仙峽道嘅嘉慧園，屬老牌豪宅，成交單位係位處單邊座數嘅高層，實用面積3,366平方呎，實用呎價3.89萬元。按土地註冊處資料顯示，張家輝以個人名義買入。翻查資料，發現張家輝之前未以個人身份持有物業，以往均透過公司購買物業，居住物業亦係太太關詠荷購入。今次估計應屬首置，可省辣稅1,500萬元。對此張家輝經理人只係話：「唔回應。」
另有指楊思琦剛買入觀塘道工廈The Icon 9樓雙號室收租，單位建築面積299平方呎，成交價約370萬元。佢噚日回覆：「唔回應。」
撰文：馮仁昭