以新世界發展（017）主席鄭家純為首嘅永升亞洲計劃收購有線寬頻（1097），先要過有線小股東呢一關，本月29日就會開股東特別大會進行表決。有線主席吳天海最近就積極周圍拉票，連公司經理都唔放過，叫佢哋幫手呼籲身邊有揸有線嘅股東記得走去投票。
吳天海噚日與傳媒聚會時，再次呼籲小股東出席大會投票，或者委託他人代表投票，佢認為投票率高嘅話，通過方案嘅成數較高。
吳天海指，除咗29號係重要日子之外，本月22號過戶截止日同26號最後授權日亦係關鍵時間。
佢透露，上星期同200名公司經理級管理層會面，都希望佢哋盡最後努力，向身邊有揸有線股票嘅朋友作出呼籲，以理性同精明角度投贊成票，咁樣對有線而言屬最好結局。
雖然股東會通過單刁之後，仲有證監會同通訊局兩關要過，但相信後者問題不大。
望以「直通車」形式交接
吳天海又爆番少少內情，指舊年委託高盛搵新買家，不過去到農曆年後仍未有進展。直至有線今年3月自爆後，就決定自行出擊，經過數星期後，搵到永升話有興趣。
佢透露，同新股東傾緊過渡性安排，希望能順利以「直通車」形式交接，未來數月會傾大方向，等同事知道條路點行。
對於TVB近日被證監會踢爆，股東之一、具中資背景嘅黎瑞剛乃最大股東。吳天海話，據佢了解，永升應該冇兩種股權。
李華華
mailto:LiWaWa@AppleDaily.com