基斯坦奴朗拿度（C朗）入波如拾草芥，幾乎每次有波入都會刷新某啲紀錄，更何況上周二歐聯4強首回合幫皇家馬德里連中三元，領軍大勝馬德里體育會3:0？除咗將個人歐聯入球數目刷新至103球，比全隊馬體會嘅100球仲要多，計埋兩星期前歐聯次回合對拜仁慕尼黑嘅帽子戲法，更係歐聯史上首位造出「Back to back」帽子戲法嘅球員！另外，佢喺歐聯第7次造出帽子戲法，亦追平美斯嘅紀錄。
以上紀錄通通都冇爭議，唯獨皇馬喺官方twitter出帖表示C朗達到為皇馬射入400球嘅里程碑，就同所有媒體賽前仲差4球嘅統計有出入，連C朗賽後都自稱好榮幸為皇馬入到第400球。點解無啦啦多咗1球？原來喺2010/11球季作客皇家蘇斯達嘅西甲，C朗喺74分鐘主射罰球，省中隊友比比後明顯改變方向入網，雖然官方判咗比比入球，但比比賽後以至皇馬官方都不約而同聲稱C朗先係入球者，所以出現咗呢一球誤差。不過，C朗要入多球其實唔難，不如等名正言順嘅時候先慶祝？