上周六NBA季後賽西岸四強，勇士嘅「浪花兄弟」雖然失準，但仍憑杜蘭特（Kevin Durant）交出「雙雙」38分13籃板，作客以102:91擊敗爵士，總場數領先至3:0，只要周一贏波就可以晉級西岸決賽。（樂視明日9:00am直播）
勇士浪花兄弟今場手感麻麻，史堤芬居里（Stephen Curry）20次起手入六球得23分，K湯遜（Klay Thompson）就九射一中得六分。不過，第四節初段曾落後74:75嘅勇士，打出一段10:4攻勢拉開比數，最終贏爵士11分。雖然KD今場表現搶鏡，但佢就好似食咗火藥咁躁，俾鏡頭影到佢爆晒粗嗌爵士吉祥物快啲死出場；比賽剩番1分23秒，KD俾主隊中鋒高拔（Rudy Gobert）抽水推咗一下，之後就忍唔住報復式大力撞開對方，最終俾球證判罰一級惡意犯規兼「食T」。另外，勇士主帥卡爾（Steve Kerr）因出現脊髓液滲漏後遺症，自季後賽首圈對拓荒者Game 3以來一直缺席，班主拉格比（Joe Lacob）就大爆卡爾上周五已接受手術，希望佢盡快歸隊。