由亞洲職業籃球總會舉辦嘅2017城市三人籃球賽，噚日喺灣仔修頓籃球場進行第二日比賽，男拔贏咗學界宿敵英華奪U17男學界組冠軍，而康仁維肝喺男子公開組決賽以20:18險勝PABC封王。
亞職籃今年首次喺香港辦三人賽，雖然賽事籌辦得幾急，但搞得算有規模，既有DJ播歌，又有音響同燈光等設備，加上有嚟自CBA嘅啦啦隊熱舞助興，又同觀眾玩射波遊戲送禮物，氣氛相當熱烈。連剛助冠忠南區喺港超聯拎到季軍嘅謝德謙，噚日都同靚仔主持陳安立等為ViuTV出戰媒體組後都大讚：「比賽氣氛相當唔錯，球場又有幕，幾好玩㗎！」女子組方面，協恩中學以21:10克裘錦秋中學（葵涌）喺U17女學界組封后，而均安就以13:10贏福建捧女子邀請組冠軍。