曾參與電視節目《盛女愛作戰》嘅婚姻介紹所老闆吳美玲（Mei Ling）買樓真係好像買棵菜，3年前以約1,643萬元買入信置（083）同市建局合作發展嘅灣仔囍滙一個單位，步出賣樓廠，就被一班記者捉住採訪，當時佢好坦白咁話，同朋友飲完茶，俾佢帶去買樓，「戇居居買咗層樓！」
拍賣行顯示，囍滙2期2座15樓A室，實用760方呎，開價1,950萬元。資料顯示，業主是吳美玲，與《盛女愛作戰》嘅婚姻介紹所老闆同姓名。家陣辣招鬆綁，佢就將單位放售，若以開價沽出，單位升值19%，仲賺成300萬元。查實呢口價要出貨真是唔難，睇返呢個樓盤近期啲成交價，上個月有4宗二手成交，全部都同Mei Ling一樣係2013年一手買入，賺錢幅度由19%至22%。