以香港今日呢種高樓價現況，社交場合談論得最多應該係上岸，亦應該有更多所謂企業高層提早退休，留返上位機會畀啲細嘅，自己收租享受人生。不過現實見到嘅係，做咗好多年嘅高層都係同一班人，年輕人向上流動變咗政治口號，永遠冇辦法解決，最直接原因係上一代未賺夠，退唔到落嚟，下一代就上唔到位。
上岸係一個社會嘅良性循環。上一代退出騰空職位，下一代直接向上爬。就算淨係用最簡單經濟學去理解，多咗人選擇「退市」上岸唔撈，粥多僧少，人工都有較大機會增加。
大部份嘅打工仔，微觀嘅願望，就係想早啲放工；宏觀就係唔想返工，早日上岸喺屋企玩雀。真正熱愛工作嘅人，其實只係少數；所謂戀棧權位，亦都只係因為仲有所求先要戀。特別係選擇咗打工而唔係創業嘅人，權力慾其實好有限，準時放工先係永恒真理。
樓市一直向好，本來應該係一個契機，因為「打工＋買樓」喺香港係絕配，持有物業致富人口一定遠多於股票，騰訊（700）升幅遠勁過樓市。但回想10年前，借7成錢合共500萬蚊買樓嘅大有人在，相同槓捍買騰訊嘅人相信少之又少。而且香港有2000間上市公司，長升10年嘅股票只佔極少數，即使以同樣孖展去買股票，買到嘅多數都係滙控（005）或盈富基金（2800），唔係話兩隻股唔好，但相對買樓，十年前瞇埋眼買都會有派彩，買股票更考眼光，買樓近乎無技術可言。
不過，近十年因為稅制同埋按揭收緊，買超過一間樓有難度。間中有報道話，月入6位數字嘅人，都要父母幫手畀首期，而相同薪金嘅人，即使好彩喺之前買咗一兩間，亦都冇能力再買落去，唔似97年前買樓一拆二、二變四。紙上富貴易有，退休上岸難求，令到大部份人最大收入來源仲係份糧。客觀結果係：有辣招前儲夠貨上岸嘅人繼續玩雀；辣招後呢條路已經封咗，少咗人上岸，連帶就業市場都冰封埋，新入職嘅人點捱都唔會捱得出頭，因為上面已經坐滿晒一批同你一樣上唔到岸嘅人。
每次寫呢類向上流嘅題目，都會有讀者問點解決，答案係冇得解決：即使取消辣招，都唔會突然間買到幾層樓，亦唔會有足夠人退休騰出上流職位。更何況，維持香港人僅僅夠糊口但做餐懵，似乎係回歸後政府想營造嘅社會氣氛，因為一旦太多人得到經濟自由，就會失去一班營營役役嘅順民。
高明
http://www.fb.com/bigricetea
本欄逢周一刊出