見潘頓起孖，雷神有蔡約翰呢個靠山支援亦唔執輸。在第三場贏完蘇偉賢馬房「靠眼光」，到第六場二班1000米直路賽，雷神再下一城，以蔡廐「喜悅繽紛」搏殺得手，單Win及組合獨贏A2分別派44.5及26元，雷神暫時起孖同潘頓睇齊。
四歲馬「喜悅繽紛」季內大熟大勇，之前已贏四場，加上今次初跑直路賽即勝，成為季內最新一匹五捷馬，本身服役成績增至14戰五冠一亞一季，表現相當理想。
雷神逢出必熱，但胯下馬好少閘前至着啡燈變熱門，「喜悅繽紛」堪稱異數，臨尾由原本10倍一直跌到4.4倍啡燈開跑，結果拉士順利追過最先突圍的「歷險家」勝出，帶挈落飛黨贏咗筆大錢。「歷險家」力拼飲恨做阿二，久休三個多月復出有此表現算唔錯，三、四名分別為「駿皇綵」及「一哥」，四重彩派四萬四千幾。
大摩與韋達合作的全港最高分三歲馬「駿皇綵」，這天（7日）賽前四出四捷，被捧成2.4倍頂頭大熱，外檔起步早段留住跑，拉士發力時全面受阻，韋達左抽右避亦冇晒符夾硬收慢，到有位望空之際已經到終點，僅僅保番一席季軍位置，惟本身在港連勝紀錄卻告一段落。而杜利萊座騎「朋友仔」同樣塞到飛起只得第六名。