東京潮店林立，大把有趣又特別的店鋪，而講到有趣，這間「#FFFFFFT」的店一定榜上有名。單是店名「#FFFFFFT」已夠有型，其實這是代表白色的色號，顧名思義全店只賣白Tee，都未夠，最寸係一星期只開周六中午12點至夜晚7點，仲要講明不定期休息，想朝聖都要就啱日子。
就算嚟到有開舖，你都要預留時間排隊，事關店舖由廢棄車房改建而成，店子細得可憐，每次只會讓6至7人入內，記者到訪當日就足足排了一小時才能入舖。店內裝修極簡約，清一色掛滿白Tee，V領、圓領、樽領、有口袋、沒口袋甚麼款式都有，雖全是白Tee，但細節位件件不同，而且全都是日、英、美、法等製造，品質相當好，當然價格亦有番咁上下，平均都要港幣$400至$800左右一件，白Tee愛好者不妨朝聖一下。
#FFFFFFT
地址：東京都涉谷區千駄嫲谷2-3-5 1F
記者、攝影：韓繼聰
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily