大編輯去麥奀記食雲吞麵，食完之後就來短訊感嘆：「香港雲吞麵好正吖，唔明白依家年輕人少吃雲吞麵，潮吃日本拉麵。」哦，新興潮流沒法擋，香港人喜歡做「哈日族」，好似記者小G咁，係潮流嚟嘅，食雲吞麵就係老土、過氣、老人家嘅嘞。
其實中環有兩家麵舖賣雲吞麵，係客似雲來嘅，就係羅富記與麥奀記，中午想入內搵個位都難。左丁山喜歡麥奀記多啲，但發覺當作下午茶點就好，中午當飯食就有難度，現時一碗麥奀記雲吞麵，係非常正斗呀，但份量少啲呢，連食量少嘅小G都要起碼食兩碗，左丁山就食三碗都未夠填肚。相反，到同在威靈頓街嘅豚王食拉麵，一碗再加麵，就會食到飽，價錢就相等於三碗麥奀記雲吞麵。中環還有兩間××記與Y記賣雲吞麵嘅，份量與一粒雲吞嘅「晒士」大過麥奀記幾多吓，但一吃便知龍與鳳，左丁山冇興趣再幫襯，等其他人在門口排隊嘞。
日本拉麵食得多，味道係夠晒濃郁，啱年輕人口味，但食得多就覺得肥膩，摩登健康OL那敢日日吃？於是味道簡單清爽，多洋葱芽菜嘅越南牛肉湯河乘時而興，威靈頓街間BEP長期有中外顧客排隊，砵甸乍街間Brass Spoon到下午兩點幾，仍然坐滿食客，舊恒生總行（Nexxus）地下亦開咗一間越南新式靚裝修食店。在香港開越南料理，限於租金高昂，不能開得太大間，當作快餐店只賣牛肉湯河、檬粉、春卷就最實際，牛肉湯河份量足夠一位OL食用，一定健康過食碗日本拉麵。
想話食全套越南菜，去邊度搵？老友食家M介紹全港獨一無二，夠膽設於酒店內嘅Le Soleil，就係在尖東帝苑酒店四樓（電梯上三樓再行樓梯）。聽講Le Soleil本是三藩市越南菜館，郭老闆在三藩市試過之後，立即遊說主理人，力邀該店到帝苑酒店開業，現任廚師係一位越南裔女士。既然係酒店內嘅越南餐廳，香港獨家，廚房面積當然可以大啲，於是可以提供不少湯河以外嘅菜式。上星期一放假，左丁山本想請肥仔K等人到Brass Spoon食牛肉湯河，後來記起該店逢假期休息，於是作罷，但勾起肥仔K條筋，係要食越南菜，於是諗起食家M之言，晚上十幾人就去帝苑Le Soleil，女廚師親自介紹咖喱蟹、番茄牛尾、柚子蔬果沙律、蔗蝦、下龍灣炒蟹、菠蘿炒飯，最後配以一細碗牛肉湯河。十幾人喎，唔揀邊樣嘞，女廚師講乜就食乜，吃個不亦樂乎，一細碗牛肉湯河尤其精彩，個個話好正呀！