任期尚餘不足兩個月嘅特首梁振英，雖然係夕陽期，表現卻好高調，早前批評「反對派」示威阻住佢落區後，近日就頻頻上載落區相片同短片，力證自己冇有怕。好似噚日咁吖，佢就去咗大埔區，然後喺facebook上載短片，一如所料全部片段都見佢被簇擁好受歡迎，但原來有位烈女一度狙擊佢，689只能以笑遮醜。
老友記簇擁集郵
有住喺大埔嘅街坊一早向八方報料，話一朝早落街就撞到689，認真邪！梁特噚日由民建聯忠實梁粉、雙料議員嘅劉國勳陪同下巡大埔區，的確有唔少中老年人向佢索取合照，仲好似粉絲遇見偶像咁攞起手機重重包圍住佢㖭；但其實周圍都有人藐藐嘴㗎，喺689嘅facebook梗係睇唔到啦。
網民Rocena Lee Yan Yan則自行上載狙擊梁特嘅兩段短片，不滿「689X街落大埔扮落區親民，#家陣就畀你聽下民意呀X街」，連珠炮發向梁特追問橫洲、TSA同收受UGL 5,000萬嘅風波，要求689向全港人道歉，但梁特全程冇理，以笑遮醜。
佢仲話梁特身邊「全部係警察同戲子，圍威喂扮落區」，仲報稱有疑似女警阻擋佢嘅鏡頭，有網民讚佢係女中豪傑，亦有網民向梁特進言，「689，你係咪好想聽直接民意嘅？這便是直接民意了！」
喺烈女上載狙擊片後，梁特亦喺fb連環出po，講述噚日落區，自稱「零距離接觸市民」，透露喺大埔墟行過街市後喺沙頭角街市飲下午茶，仲買咗半隻白切雞同半隻白切鴨喎。
李八方