新世界（017）執行副主席兼總經理鄭志剛（Adrian）每次現身總喺官仔骨骨，西裝眼鏡袋巾由頭襯到落腳，噚日佢就罕有地身穿熊仔T、鮮黃色長褲，展現佢「好動嘅一面」：就係示範踩單車喇。
Adrian噚日邀請一班記者參觀新世界最新的西貢豪宅樓盤「傲瀧」，順便行下佢個34萬呎會所連花園，其中一項設施係長達950米的單車徑，仲有單車可以租畀住戶使用。Adrian介紹得興起，突然自告奮勇話要試踩，仲踩唔停要記者叫住佢返嚟。睇Adrian技術都算唔錯，佢就話自己平日都有踩開單車，不過就無透露踩開邊頭喇。唔知佢有無同一樣「愛踩車」的新鴻基（016）執行董事郭基煇（Adam）交流吓心得呢？
講返傲瀧個盤，Adrian話係佢推動「Artisanal Living」5年以來比較成熟的作品，除咗理所當然地有一系列藝術品外，今次就連花草都講究，逾27萬呎既園林內有逾千棵樹、共33個品種，Adrian話每個品種佢都有份揀過嘅，係要襯返棵植物嘅顏色，仲要揀啲吸引到蝴蝶的花，個園林先有層次咁話。希望除咗樓宇的硬件質素要做好之外，亦畀到用家舒適和融入自然嘅氛圍。