所謂順開有條路，以往較少合作的騎練潘頓、高伯新呢個禮拜可謂擦出火花，兩人剛周三（3日）晚谷草憑「文藝學家」勝出後，今午（7日）再以「智者」攻下田草第四場四班1600米，攜手錄得合作連勝兩次賽事。其中「智者」負133頂磅排13檔，貼欄一放到底，打破本身約兩年半頭馬荒，單Win及組合獨贏A2分別派46及26元。
年屆七歲的「智者」最近一次贏馬在2014年12月底三班田草1600米，連同今場共五捷均田草1400或1600米，乃一匹中班一哩好手。
潘頓騎「智者」原本三戰非季則殿未威過，呢次故劍重逢跑四班1600米，排到不利的13檔兼孭133頂磅，原本形勢唔算太突出。不過，騎練合作順開唔同講法，「智者」由起步冇耐到過終點一刻，都係貼欄早着先鞭，令到沿途跟住佢跑的次熱門「塑料喜」始終難越雷池半步，「智者」就此輕勝0.75馬位，亦令今期僅出一駒的高伯新取得100%勝出率。呢位英籍練馬師季內增至11場頭馬，贏多五場就可以達到續牌指標。
第四場二至四名順序為「塑料喜」、「兄弟勁」及雷神大熱門「凱旋星光」，四重彩派一萬四千幾。其中「塑料喜」是前年本港拍賣會最高身價（700萬）成交馬，至今14戰五亞仍未開齋，馬主鄭建生暫時運氣麻麻。