郭思治（郭Sir）過檔民眾金融科技（279）旗下民眾證券後，又有新搞作嘞，唔係騷肌肉，而係帶團上中山，食住龍躉龍蝦、摘荔枝兼聽投資講座，成3個鐘任你問喎！唔通郭Sir係應財爺陳茂波嘅呼籲，要多啲去大灣區遊樂，唔好成日掛住去日本？
包投資講座任問
郭Sir話其實佢早係10年前就曾經搞過財經旅行團，之後一直冇encore，今次徇眾要求再搞咁話。以往郭Sir自家舉辦嘅投資講座都係免費入場嘅，今次帶隊嘅兩日一夜團由永安包辦，6月24日出發，預計200人參加，行程包括摘荔枝兼聽投資講座，任你問3個鐘。上個禮拜開始宣傳後，聽講已經有幾十人報名。呢個團原價1,388蚊，大小同價，但報名時講得出個推廣碼的話，每位減100蚊。郭Sir仲預告，如果反應好，可以諗吓去遠啲、甚至出國㖭！華華噚日打去永安問，暫時都仲有位，但永安哥哥話啲位去得好快，有買趁手咁話。
睇番2007年經濟幾好嘅時候，永安曾經搞過一系列股評人旅行團，曾淵滄、鄧聲興、沈振盈同郭Sir都有份，有興趣跟團嘅都係高消費客仔，例如律師、醫生、中小企老闆之類，多數係40歲上下嘅投資者，食宿安排好啲，團費可以貴兩、三成。噚日永安哥哥就話暫時未有其他股評人帶隊嘅旅行團喎。
李華華
mailto:LiWaWa@AppleDaily.com