3.26特首選戰過咗個幾月，777票當選嘅林鄭月娥忙於埋班，明言擔心7.1唔齊腳宣誓，認真辛苦；敗選嘅曾俊華輸選舉但贏民心，閒時喺facebook講近況，逍遙快活好happy。雖則唔少薯粉對曾俊華仲有遐想，覺得佢應該喺政壇多啲搞作，但花生友聽聞，薯片叔冇諗住重返台前打真軍，反而因為選舉而人氣急升嘅財爺前政治助理羅永聰年輕又有橋，唔少薯粉打佢主意。
今年39歲嘅羅永聰，做過傳媒又入過政府，傳統名校皇仁仔，港大法學學士同新聞碩士，仲去過英國牛津大學任訪問學人，今後嘅去向極受政圈關注，而佢喺選戰過後除咗出席一啲分享會，至今似乎未有新動向。
吖，有啲薯粉唔知係關心呢位叻仔嘅生計，抑或好想延續薯片叔帶嚟嘅美夢？據聞有人游說過羅永聰出戰補選，覺得薯片叔既然團結到建制淺藍派同民主派，若然由幫佢搞選舉嘅愛將羅永聰代為出征，唔排除可以殺出新血路喎！
至於係九龍西抑或新東落腳？據知都冇討論，皆因羅永聰冇乜出選意欲，討論惟有暫時告終。花生友都問過羅永聰會唔會考慮出戰補選？佢回覆「太抬舉了」四粒字，認真令人回味無窮！
其實頭號薯粉田北俊早前曾稱，想搵曾俊華同曾鈺成合組聯盟繼續發聲，兼薦人參加立法會補選，莫非羅永聰就係佢嘅心水人選？
花生友
逢周一刊出