邵子風日前同龍小菌去咗新蒲崗嘆點心，但就唔見女友蝦頭楊詩敏喎。其實啱啱過去一個月，蝦頭都好忙碌，冇乜時間黐住男友。
蝦頭自從13年同黃子華合作《My盛Lady》後，由舞台跳入大台，外形親民、角色搞笑，多咗好多師奶fans，有時仲會參與埋大台嘅演出。呢排睇電視唔係好見佢，原來蝦頭上個月回歸舞台，同梁祖堯嘅風車草劇團合作演出舞台劇。
喺同一時間，蝦頭都有為大台嘅重頭劇《誇世代》演出，除換咗徐小鳳嘅髮型，仲見佢着黑絲孖邵美琪、陳豪有對手戲，keep住舞台電視台雙線發展。
工作咁忙，梗係要relax下，早一個星期，佢就同邵子風一齊去咗泰國休息，叉夠電喺今個月再搏殺。至於閒時，呢排蝦頭就迷上玩最近大熱嘅指尖陀螺，仲練成一招神技：將個陀螺放喺鼻上面轉。