上期講到滙控（005）值得買，因為暫停回購一招「無招勝有招」，令市場覺得顯示出滙控大把在手，未來有大把絕招撐起股價。投資者惜貨到大跌市掟都唔敢掟。滙控呢一着，可成為財技以及市場心理戰嘅教材。
要配合暫停回購都可以頂住股價，首先要畀到投資者業績上嘅憧憬。滙控第一季經調整收入按年升2%，財務董事麥榮恩特登「發盈喜」，話滙控全年收入增長可達3至4%，就係想畀到市場有「收入回復穩定增長」嘅預期。滙控08年金融海嘯至今未曾出現過穩定增長預期，可以想像對股價有幾利好，一旦市場信了，稍後股價要突破海嘯後高位似乎不是夢。
滙控呢間百年老店，市賬率1倍多少少，現價升一成、市賬率去返1.2倍仍絕不過分。滙控股價企得穩65蚊樓上嘅2013年至2014年中長方形底部，稍後上返阻力位長方形頂部，首站應該可以見75蚊，講緊只係首站。
一連兩日大調整，對於揸實科網股嘅投資者構成頗大考驗，堅持坐實舜宇（2382）、瑞聲（2018）自然有啲膽博膽，但係舜宇貴為股王級數，MACD一日未破頂，股價理應未升完，暫時信住先。
晉佳
http://www.fb.com/advanceguy1
本欄逢周一、三、五刊出