前特首、政協副主席董建華上月到瑪麗醫院求診，佢嘅發言人話董生係接受例行身體檢查。外界好關心佢老人家會唔會有咩唔妥，董伯噚日現身紅館，為一個佛教活動主禮，驟眼睇，董伯精神有啲恍惚，不過手腳仲算靈活，起身、坐低、出出入入、上落樓梯都可以自己嚟，唔使其他人攙扶，未見腳痛痕迹。
該活動嘅升國旗期間，老董雖然雙手垂直，但右手不斷握放拳頭，唔知係咪隻手有咩特別病痛，唔通佢同都市人一樣都掛住玩電話玩到關節痛？不過，佢嘅意識應該仍然清醒，識得喺啱嘅時候拍手、主禮呢啲簡單動作。佢冇留足全程，同梁愛詩一齊早走，坐同一架車離開，老董走路嘅速度都幾快，睇嚟佢嘅健康都仲可以。