巴塞隆拿名將朗拿甸奴顛峯時期有幾好波就唔使多講，當年甚至令皇家馬德里主場球迷都心悅誠服為佢站立鼓掌，就算而家行年三十有七，踢表演賽一樣綽綽有餘！
巴塞同皇馬周五喺黎巴嫩貝魯特上演「元老版」國家打吡，細哨身為球會大使當然有份上陣，亦係佢自2008年轉投AC米蘭以來首次重披巴塞戰衣落場踢波，結果交出3個美妙助攻幫球隊贏3:2，法國快翼古利受惠射入兩球，包括第一球接應細哨「no-look」chip入禁區傳送輕鬆射入，回憶返晒嚟！另一球就由森馬奧建功，皇馬就靠費蘭度辛斯同查維古里路入波追近比數。巴塞傳奇隊6月30日更會喺魯營迎戰曼聯傳奇隊，球迷們想懷緬那些年記得留意！