特首選戰過後，各界關注新特首點樣分餅仔，八方則聽到唔少選戰中趣聞，包括工聯會陳婉嫻堅持公平競爭，原來當林鄭陣營邀約嫻姐安排陪同落區，嫻姐竟然主動邀請埋曾俊華同胡國興落區，實行唔畀林鄭獨佔佢，希望選舉一視同仁，證明唔好以為凡係紅色陣營，一定會對西環事事逢迎。
八方睇番資料，又係喎，嫻姐的確係3月22日、即係3.26投票前幾日，先後陪同當時跑緊馬仔嘅3位候選人落區。薯片叔同胡官就喺嫻姐陪同下到黃大仙上邨視察，其間有長者反映過現時嘅生活難題；林鄭喺嫻姐陪同下到訪啟德河同黃大仙，仲喺facebook貼咗探訪嘅短片。
奶媽陣營搵上門
其實當時政圈已經奇怪，選戰前倒數近一周，中央支持林鄭下，戰局幾乎已定，作為工聯會重量級人馬嘅嫻姐，竟然仲幫未獲中央開綠燈嘅薯片叔同胡官搭台？結果真係事有蹺蹊，有花生友同八方講，嫻姐係獲林鄭陣營主動邀請陪同落區，對方提到嘞喎，又冇理由推卻㗎，但嫻姐又唔想畀林鄭獨佔、令人覺得佢支持對方喎，結果諗到個兩全其美嘅辦法，就係主動邀請埋林鄭兩個勁敵同日到訪，既不會得失任何人，亦不會令人誤會佢落咗注，認真一舉兩得。
八方則覺得，呢下走位同時有助嫻姐明哲保身，兼保持不敗之身，所以話呢，有時薑真係越老越辣，不得不佩服㗎！
李八方