向來係僱主代表、路線右傾嘅自由黨榮譽主席田北俊，啱啱過咗嘅星期六晚竟然同代表打工仔、路線左傾嘅工黨前立法會議員張國柱，「拍拖」到油麻地田記粉麵茶餐廳撐枱腳，仲搞爛gag話「田記去田記魚蛋粉」，究竟搞邊科？
田少話佢係接受張國柱嘅邀請，去油麻地同一班社工分享未來社會形勢。未來？乜香港仲有未來嘅咩？田少好樂觀，之不過要喺中環、山頂遊走嘅田少，紆尊降貴過海去到龍蛇混雜嘅油麻地，認真難得，但田少話喎，「唔係要選特首先可以落區嘅！」
田少噚日亦出另一個post，話相當認同幫曾俊華打選戰嘅前政治助理羅永聰所言，唔好以為一個是但噏、求其影張相嘅post就可以呃到千千萬萬個like，咁樣係太睇小香港人。田少經常被指喺facebook抽水，絕對有資格咁講。