男女雖然有別，但唔少工作無論男或女都勝任有餘！好似中國喜嫁傳統中角色好重要嘅大妗，邊個話男士唔做得？60歲退休警員鄒國基就打破傳統入行，同時修讀司儀同說話技巧課程，朝早做大妗，夜晚任婚宴司儀，殺出一條血路。
唔方便整理裙褂
大妗通常識得搞氣氛，對鄒國基嚟講冇難度，「杯中紅棗一雙雙，新郎新娘很快請吃薑」，即時令新人同賓客笑唔停。佢對習俗涵義亦好熟悉，新娘向父母奉上熱紅棗茶之時，佢就在旁解釋呢杯謝恩茶寓意子女長大，感謝父母養育之恩。
當咗差34年嘅鄒國基退下火線後唔想無所事事，而佢一直好尊敬大妗，覺得佢哋多才多藝，面面俱圓，所以5年前報讀耆康老人福利會「傲齡動力－－友待長者就業計劃」嘅專業大妗姐課程，為興趣入行。佢話男性做大妗確實有難題，例如唔方便為新娘整理裙褂，所以佢通常拍住女大妗一齊工作，互補不足，仲試過憑做警員嘅觸覺識破渾水摸魚嘅假賓客。
耆康會主席麥建華話退休長者再就業係三贏，除咗長者可以繼續貢獻社會，僱主亦可解決招聘問題，社會經濟亦持續發展。