「牛下女車神」李慧詩喺公眾面前既堅強又有毅力，但查實呢位30歲嘅運動健將同一般女仔冇分別，都有偶像同鍾意扮靚。
女車神接受馬會刊物《駿步人生》訪問時透露，由細到大都迷謝霆鋒（嗱，嗰時霆鋒應該仲未識整淋過毛巾嘅雞蛋仔嘅~），話謝霆鋒間中時有反叛，但最終創出自己嘅事業，可見唔係每個人都完美，要不斷喺錯誤中學習同調校；佢亦自爆每次出賽都會聽組合農夫嘅《456 wing》，話佢哋嘅歌詞好有意思，除咗情歌仲關於社會，2012年奧運開始聽到𠵱家。
鍾意扮靚 龜龜陪瞓覺
唔使比賽或訓練之時，佢話都會打扮下，包括搽指甲油、化妝同買新衫；祖籍潮州嘅佢最鍾意飲茶，仲會「普洱當水飲」，每次出trip則會帶一隻公仔「海龜」陪瞓覺，攬住就好容易瞓着咯。