政府推出垃圾徵費，環境局局長黃錦星自然要四出推銷新政，而佢噚日出席商台節目時就同拍檔「大嘥鬼」一齊登場，咁又係喎，政府指定嘅垃圾袋有大嘥鬼嘅嘜頭，而大嘥鬼亦換上綠色膠袋衫新造型，望落非常sharp醒，自然係最佳推銷員。
星爺噚日曾被主持問到：「有信心留任？大嘥鬼！」佢回應指，大嘥鬼有自己嘅facebook，fans都成幾萬個，都會擔心大嘥鬼嘅前途，但都毫無醋味咁自嘲：「佢民望高，fans好多，多過我facebook。」
都係講番正經事啦。黃錦星節目中話呀，政府曾與唔同持份者及議員接觸，對垃圾徵費嘅初步反應都係正面，但佢承認喺屋苑範圍內執法，舉證係有困難嘅，但相信總有辦法解決，但政府暫時都冇計劃效法外國嘅做法，包括要整穿非法棄置嘅垃圾袋，去調查垃圾所屬住戶等。