【爆相爆片】男神王宗堯舊年俾𡃁模女友黎紀君狠撇之後，今年年頭又俾蔡潔飛。不過佢冇因為咁而被打沉，日前佢就被發現同個女仔撐枱腳。讀者梁先生透過本報「爆相爆片」報料，話日前喺荃灣一間cafe見到王宗堯同個女仔撐枱腳，佢話：「王宗堯比較避忌，反而個女仔好主動，不停將個頭挨近男仔。過馬路個女仔有捉住王宗堯嘅手臂，跟住王宗堯反手搭住個女仔條腰，之後個女仔好嬌嗲咁問王宗堯：『我哋係咪返屋企？』王宗堯就話：『係呀，我車你返去。』」
「順便畀手信」
馮仁昭噚日問王宗堯係咪有新戀情，佢笑住話：「梗係唔係喇！嗰日只不過係做完嘢，咁啱大家都得閒，所以咪一齊食嘢，順便拎啲手信畀佢。食完嘢，我有揸車咪順便車佢返屋企。」原來嗰個女仔係Super Girls成員李靜儀（Heidi）。Heidi噚日同隊友喺商台宣傳新歌，佢回應話：「我哋識咗好耐，要追一早追咗啦！食完飯，我咪問係咪返屋企囉，其實王宗堯都係送我返屋企。」Heidi話雖然王宗堯係單身，但都唔會有機會發展，仲祝福佢快啲搵到新女友。
撰文：馮仁昭