內地飲品股天喔國際（1219）噚日公佈業績，盈利跌4成，公司順便換走行政總裁（CEO）王珏瑋，由老闆林建華身兼主席同CEO兩職，並委任24歲太子爺林奇入董事局做執董。
天喔指，王珏瑋要專注於旗下合營企業南浦食品嘅日常管理，所以辭任天喔CEO，由主席林建華做埋。咁林老闆當然要搵人分擔吓工作，順理成章搵阿仔入董事局。
太子爺林奇4年前畢業於倫敦大學學院，獲數學學士學位，畢業後先加入南浦，舊年1月加入天喔，目前負責天喔茶庄日常營運兼監督集團市場部。如今升做執董，年薪有57.6萬人仔，除開一年，月薪4.8萬人仔。工作幾年就有呢份糧，真令人羡慕。