綠色和平上星期向3位特首候選人，提問5條關於日常生活嘅環保問題，包括佢哋多唔多衫、有冇用含微塑膠護理產品、食唔食魚翅、幾時先開冷氣、同埋咩原因先會換手機等等，睇下佢哋環唔環保，但至今暫只得胡國興回覆。胡官話呀，佢啲衫大部份都着咗逾40年、只會用傳統肥皂、親友宴客時先會食翅、27℃以上至開冷氣、手機爛咗加上仔女要求下先會換手機，𠵱家就用緊太太嘅舊手機。
綠色和平讚胡官快人快語，率先回應環保問題。八方就覺得，平時見胡官出嚟着嘅衫都唔算殘舊，如果真係着到40年，件衫真係保養得幾好！
至於薯片叔同林鄭呢，至今都未覆綠色和平嘅，唔通佢哋因為係選戰大熱，一票不能少，覺得3.26投票日之前，拉票梗係較回應環團提問緊要啲？