就在林鄭串鬍鬚：你枱頭無file無紙，我就成枱文件大把嘢做的同一時間，被譽為「民望高」的高永文局長回應傳媒說，林鄭無搵過佢，留任與否，懸而未決。
擺在眼前的局長團位置，林鄭就算當選都無權過問，必須聽命西環。三司局長，遍佈線眼，日日釘住，枱頭有乜都scan過晒，無得起飛腳。林鄭埋班，下場與葉劉無異，必然要等西環發落。
而當日見上司鬍鬚張枱好似斷捨離咁，乾淨企理，便抹黑這個老細hea到盡，無料到。今天刻意翻出這件「心頭舊恨」，師奶記仇十年未晚！財金頂爺，牽連的數據左右香港經濟，向左升抑或向右仆，全賴大數據入腦，在腦海中細磨慢琢，睇通全景，何需一枱廢紙廢file！林鄭做下屬，忙到周末都會返工以為自願OT等於好打得、有擔當，這種死腦筋今時今日還行得通嗎？被林鄭鬧到喊的下屬（可能係被鬧玻璃心！）會心甘命抵捱趴地食草、浸澗水、頂花盆五年？AO不是參加林鄭做教練的保良局領袖訓練營呀！林鄭當選，開局即眾叛親離，以為有機會攝位上的湯家驊，隨時被斷奶！