曼聯嘅法國球星保羅普巴因為上星期喺對羅斯托夫嘅歐霸盃比賽拉傷大腿而退下火線，於是冇踢球隊贏米杜士堡3:1嗰場英超，嚟緊法國對盧森堡同埋西班牙佢亦缺席。不過，普巴喺個人Instagram上載咗自己喺屋企睇住電視跳舞嘅短片，就俾網民質疑佢係咪真係有傷喇。
普巴當時睇緊嘅，係佢兩位兄弟Florentin同Mathias有份亮相嘅法國電視節目，而佢po出嚟嗰條短片，就睇到普巴自己隔住個mon手舞足蹈，好投入咁跟住兩位兄弟一齊跳舞。不過「魔粉」就唔係好欣賞，有人留言話「我以為佢受咗傷」，有人就問「佢唔係傷咗咩？」、「佢係咪應該傷咗㗎？」、「點解拉傷大腿可以咁快好番？」、「開玩笑咩，應該練罰球或者其他而唔係呢啲垃圾」，似乎都係質疑佢唔知係咪真係有傷咁囉！