做家務有分男同女㗎咩？原來政府統計過，家務通常都係靠女人做晒，51.3%女士要做屋企超過四成家務，男士得23.5%。趁噚日三八婦女節，八方決定考考平時好少做家務嘅立法會議員鄺俊宇同楊岳橋，家事功架有幾實淨。
家務助理：得5分
首先考兩位執廳，完全冇難度，6分鐘就搞掂。不過兩位成日着到官仔骨骨，原來唔識熨衫同摺衫！岳少熨恤衫話熨斗冇較熱力粒掣，當堂畀專業家務助理Dona拆穿佢：「有！」岳少堅持：「佢得呢啲呢……」「唔係呀，下面有，你都唔識熨衫嘅！」鄺神都唔好得幾多，將件恤衫叠埋當摺咗，Dona話佢哋10分滿分只得5分。但係鄺神拖地又幾OK喎，反而岳少……八方都唔知佢拖地定寫大字。
家務做成咁，要你哋湊埋仔仲得了？全職主婦阿靚體會夠晒深，佢以前日做18個鐘要買餸煮飯洗衫湊女，捱咗5年，頂唔順出返社會工作唞氣。佢話做家務都有經濟貢獻，煲啖靚湯等家人健康啲，醫療負擔都細咗，但社會以為女人應該湊仔、又白鴿眼家庭主夫，根本係歧視家務勞動者。
鄺神覺得全職照顧者唔似打工仔有強積金保障，應該爭取全民退保同家庭照顧者津貼回報佢哋。學岳少話齋，𠵱家2017年啦，要平等對待家庭崗位，就算請工人，家頭細務都應該全家商量分擔嘛！咁你會做幾多先？佢話：「力之所及！」唔知未來楊太收唔收貨呢？
李八方