立法會前主席、民建聯曾鈺成最終冇落場選特首，佢接受雜誌《JET Magazine》訪問時話喎，相信如果真係要做特首及要做得好，「將會很艱難」，又指前特首董建華、曾蔭權都係約60歲做特首，佢哋當時仲覺得可以闖一番世界，但自己已經接近70歲，「應該停下來休息一下」喎，特別以特首梁振英早前飛咗廿幾粒鐘到南美秘魯見一見習主席後，又要飛廿幾粒鐘返港為例指，若然係自己，就肯定「頂不住」！
做校長主席係歷史錯誤
佢提到特首要服侍兩個老闆（香港市民同中央政府），但一國兩制走到當下，兩個老闆嘅睇法好多時差別好大，自稱當時考慮參選係想窺探吓兩者之間差距到底有幾大喎，至今覺得「很艱巨、很艱巨」，邊個做特首都係個好大嘅考驗，自己都冇信心做到。曾鈺成嘅反斗性格喺建制派簡直係異類，佢自言性格唔係好壞，亦唔多喜歡守規矩，愛挑戰權威，所以將佢放到好正經、負責執行規矩嘅位置如校長、立法會主席，「是個歷史錯誤」，自己亦覺好諷刺㗎。