前港姐楊寶玲喺圈中嘅好姊妹並唔多，就係同佢一齊喺新城共事多年嘅蘭茜外，其實楊寶玲都曾經同前亞姐翁虹情同姊妹，以兩姊妹形像為六福珠寶店宣傳同拍廣告。
六福創辦人之一嘅楊寶玲，91年佢自掏腰包投資六福，分店開幕嘅時候，佢仲以股東身份擔任售貨員，實行做埋「生招牌」。92年，六福除咗有港姐級人馬楊寶玲做生招牌外，仲搵埋前亞姐冠軍翁虹為品牌拍廣告，當時翁虹就好有前瞻性咁，將廣告嘅酬勞作為投資落六福，成為集團嘅董事，初期楊寶玲同翁虹就經常以兩姊妹嘅形象為六福宣傳同拍廣告。
但係始終一山不能藏二虎，冇幾耐，就傳出佢哋不和嘅消息，97年，翁虹就被飛出六福嘅廣告，剩番楊寶玲一個人獨擔大旗，雖然佢哋就否認有不和，但98年，就傳出翁虹被踢出董事局，翁虹就唔認自己被踢出董事局，兩年後，翁虹就暗示話楊寶玲愛出風頭，仲話自己曾想退出六福，但就冇自主能力喎！
同年，翁虹就幫大台拍攝劇集《金裝四大才子》，劇集大收，有見及此，恒豐金業合作推出咗一系列嘅人形金飾，當時由歐陽震華配翁虹、林家棟配陳松伶、魏駿傑配文頌嫻同張家輝配關詠荷，但係經銷商之一嘅六福就飛起咗翁虹，即係所有配對人形金飾，獨欠翁虹，令到楊寶玲同翁虹不和嘅消息進入白熱化階段，當時楊寶玲就話事件同佢冇關，叫記者問番六福嘅推廣部喎！至於翁虹，當時佢回應傳媒就話自己唔想講，因為佢自己都好被動，仲話到同楊寶玲私底下冇乜接觸。有報道仲話，楊寶玲曾話自己收六福嘅股息都夠生活費，但翁虹就語帶單打咁回應話自己係窮人，點同啲有錢人吖！
直至01年，有傳媒踢爆翁虹辦嫁妝時，被揭發冇選購六福而去咗周大福買金飾，事件被揭發後，翁虹就以個人公司名義發聲明，話自己喺2000年11月已經終止同六福集團嘅關係。