徐雨石馬房「金剛秀」可以話係一匹令人失望的馬，至今跑過13次，頭12仗悉數落第，一早跌到落五班，似乎是等淘汰的貨色。
不過，「金剛秀」上仗初配史卓豐角逐谷草1200米，閘前突然落重飛，此駒演出亦大有突破，沿途居中前位置，直路力追對手，最終僅以頸位之微，不敵「合一」屈居亞軍，明顯地四歲馬「金剛秀」已開始進步冒勇，本身只是較遲熟，質素非想像中咁差。
「金剛秀」將於本周三(8日)再戰，角逐谷草五班1000米，雖然史卓豐上場發揮唔錯，但可惜他開始停賽，「金剛秀」必須換人上陣。咁究竟換邊個呢？咪係雷神莫雷拉囉，他出名是「五班處女馬救星」，季內幫過好多最低班馬開齋，趁豐豐停賽借勢初配雷神，徐雨石呢招的確高明。
仲有項數據給大家參考，雷神及徐雨石今季只曾在快活谷合作兩次，即有「嶺喜峯」、「敬無極」勝出，照咁睇「金剛秀」應該幾穩陣。