薯片叔曾俊華成功入閘選特首，原來競選籌款計劃亦到尾聲，計埋噚日仲有3日結束。截至噚日捐款數字已破500萬、捐款人數有逾2.5萬人，呢啲真金白銀反映嘅「民意」真係好真實，而薯片叔亦係fb為眾籌最後3日發文，問市民信唔信5年後唔會後悔留喺香港？5年後香港會更好？佢話自己就信，因為佢相信市民、相信香港，又話香港人只要團結，冇乜嘢解決唔到？
點解薯片叔係咁講要相信港人同團結？原來佢嘅最新宣傳廣告，就係講信任香港先可重建信任，佢仲發文話，佢要同一班年輕人拍呢個廣告，對年輕人嚟講，佢已是頭髮斑白嘅老友記，自嘲係一種「扮青春」、「扮貼地」，又話前年第一次用自拍神棍，冇人嫌佢年紀大都玩自拍，仲越嚟越多人同佢一齊玩，所以走出第一步係好重要。