好多銀行都會拍住企業推聯營信用卡，例如卡通人物、潮流品牌，甚至知名球會等，吸引擁躉搶住申請。就好似渣打銀行（2888）咁，由2010年開始贊助利物浦，聽聞咁多年嚟唔少球迷表示好期待渣打推出一張印住偶像嘜頭嘅信用卡。
同樣係「利迷」嘅渣打大中華區及香港品牌及市場推廣主管莫毅信，噚日出席利物浦LFC World香港站開幕時就話，公司會積極考慮推出球隊聯營卡，不過暫時未有實質計劃咁話。老實講，全球各地有咁多利物浦fans，推出呢張信用卡應該好有market吖！
唔講唔知，莫毅信話自己70年代已經睇利物浦踢波，就算𠵱家身居要職，凌晨都一樣唔瞓照睇比賽，「除非禮拜日啦，第二日要返工驚遲到嘛！」盛傳利物浦會喺7月來港參加英超亞洲錦標賽，莫毅信都話好期待，希望真係事成啦！