出自本港國際馬匹拍賣會、身價600萬的「巴基之星」至今表現好對辦，已經喺香港經典盃殺入亞軍，似乎身價同實力成正比。照咁睇成交價700萬的馬，豈非更勁？
咁又未必，由馬主鄭建生在港以700萬投得的「塑料喜」，至今仍未開齋，已淪落到最低之第五班，只曾攞得獎金33.6萬，有排未回本。
不過，4歲嘅「塑料喜」出頭黃金機會終於來了，此駒周日（5日）回師五班，角逐田草1600米，並將復由潘頓操刀。
睇番「塑料喜」過去跑得最接近嘅一役，正是今季初由潘頓策騎，於同程五班田草1600米拼入亞軍只輸條頸，之後隻馬上番四班，對手強咗，負輕磅潘頓又騎唔到，「塑料喜」表現立即不進反退。
今場重返五班，潘頓取回帥權之餘，人馬日前更試課大閘跑第二，已進一步谷起狀態，睇嚟隻馬大有機會取得自姚本輝轉投呂健威馬房後首場勝仗。