資深驗樓師詹濟南（詹Sir）有個香港專業驗樓學會，年年搞新盤頒獎禮，噚日舉行第五屆，總結去年驗咗40幾個新盤嘅優劣之餘，年年總遇到驗樓奇聞，去年終於大開眼界親證「殭屍露台」，不過佢就話最驚嚇係喺全新村屋窗邊發現條「化骨龍」。
詹Sir話，去年驗樓奇聞之中，最驚嚇嗰次係驗收一間全新村屋，打開窗口，有條2吋半長、乾晒嘅壁虎骨，相信俾窗框夾實走唔甩，可能係餓死咗，儼如一條化骨龍。又試過係個荃灣區嘅二手樓發現冷氣機槽有雀巢，佢講笑咁話：「可惜冇乳鴿喺度！」
幾年前佢聽啲業主話坊間有殭屍露台，一直百思不得其解，去年驗收一個港島區單幢樓終於大開眼界，原來係形容露台窄到只能容納兩隻腳掌，入咗露台要好似殭屍咁跳動。一堆驗樓奇聞盤名及地址唔似上屆咁畀貼士，事關接獲某人來電找晦氣。儘管如此，詹Sir仍堅持一貫作風，坦言「唔驗樓會餓死！」
總結去年新盤交樓質素，2016年最佳質素屋苑及五大優秀屋苑，長實（1113）仍然冇份。最佳質素屋苑係新世界（017）西環Eight South Lane。另外，今年新增五星級屋苑，評分標準包括樓宇質素、會所設備、社區及教育配套等，獲評此級評屋苑包括北角柏傲山、大埔逸瓏灣、何文田天鑄、將軍澳The Parkside及馬鞍山迎海．駿岸。