施蒙尼，做乜你唔信邪，係都要搵基沙文射12碼呢？好在呢次有費蘭度托利斯（費托）補中救全家！32歲嘅費托之後仲入多粒，幫馬德里體育會喺上周六西甲主場贏雷加利斯2:0。
基沙文12碼又宴客
開波15分鐘，費托就幫馬體會博到12碼，又係交畀基沙文射，但呢位應屆金球獎兼世足先生探花真係射得好差，就咁射中間，簡直係冇角度，而力度亦唔勁，所以被雷加利斯門將伊亞高救出，真係醜死鬼。好在老前輩費托喺隔籬幫佢補鑊，補中先開紀錄。基沙文啲12碼廢，唔係今日嘅事；佢加盟馬體會之後射過七次12碼，竟然有五球射失，其中兩球中楣柱，有三球就被門將撲到。真係搵個中堅去射，啲成功率都分分鐘仲高過基沙文。唔知曼聯見到基沙文射12碼咁差，會唔會縮沙唔想買呢？
比起基沙文，呢場費托就踢到曉飛咁，啲狀態返晒嚟！其實，費托之前都沉咗好耐，對上11次西甲上陣都冇入波，但教練施蒙尼見佢上周中場西盃後備入替之後踢得唔錯，所以毅然搵佢踢正選。換邊後，費托盡顯佢射手嘅冷靜，接應安祖哥利亞直線，挑過門將射入，梅開二度，幫馬體會贏雷加利斯2:0。原來費托16年前第一次幫馬體會上陣嗰陣，對手咁啱就係雷加利斯。施蒙尼賽後讚費托職業態度好，有冇正選都刻苦訓練，但講到續約問題，施蒙尼話：「費托有冇得續約要睇好多因素，包括球會、體育總監同埋教練，但最緊要都係成績。」
美斯被換出嬲嬲豬
馬體會嚟緊周二就會同巴塞踢西盃四強次回合，對手巴塞上周六聯賽留力，但主場都以3:0大炒畢爾包。柏高艾卡沙喺18分鐘開紀錄，美斯喺40分鐘窄角度射入罰球拉開到2:0。見大局已定，教練安歷基喺64分鐘換走美斯，但美斯好似唔多滿意咁樣，因為自2014年後，美斯就未試過因為非受傷原因而被換走。不過，當美斯見到阿歷斯維度幫巴塞射到3:0完場，啲笑容就返晒嚟，同今場坐足90分鐘後備嘅蘇亞雷斯有講有笑。安歷基賽後唔評論，因為覺得班記者不懷好意，想借意渲染件事。我求大俠覺得安帥都係想美斯留力打馬體會箒，相信美斯都明白嘅。