日本藝能界女神水原希子，最近為香港加持，因為旅發局噚日搵咗佢喺東京出席活動，由商務及經濟發展局常任秘書長容偉雄、旅發局主席林建岳主持儀式，仲頒發「星級香港迷」證書畀佢。
400萬粉絲 真正KOL
事關水原希子好鍾意香港，嚟過好多次，舊年9月仲為日本NTV電視台拍攝香港旅遊專輯《Another Sky》。
水原希子噚日分享嗰次嘅回憶，覺得喺香港街頭小巷行街，每次都會有新發現，而且由市中心出發一陣間就到離島郊區。佢每次來港都會專程去食最愛嘅皮蛋粥。另一位嘉賓係日本銀座久兵衛主廚今田洋輔，佢話欣賞香港美食，仲從中取得靈感創作壽司。
呢期興講KOL，但水原希子就無花無假，因為IG有逾400萬粉絲，每次分享來港旅遊樂趣，都好有宣傳作用。