資深股評人陳永陸（陸叔）近排相當忙，除咗幫電視台拍片，仲要湊住一對出世冇耐嘅孖孫仔，問佢認唔認到邊個係大孖、邊個係細孖，佢甜絲絲咁話，細孖較大孖輕半公斤，所以一抱就知道。
講番財經大事，陸叔過去一直有儲開人仔，人仔早前下跌，佢舊年亦減持一半人仔資產，只保留一半人仔，搬番落嚟香港做高息定存。
最近人仔超緊張，佢喺私人銀行做咗一筆6厘年息嘅定存，講笑話如果今年跌6%就當白做，但相信情況唔會咁差，冇得輸咁話。
雖然陸叔唔好意思講揸住幾多人仔，但佢喺得私人銀行做，冇一球美金應該走唔甩。至於邊間銀行私銀咁高息，陸叔冇講到明，但就話家陣用緊恒生（011）同埋永亨。有大量人仔嘅豪客，想搵高息銀行做定存，自己搵喇。