青年新政梁頌恆同游蕙禎因宣誓風波而喪失立法會議席，隨之而來係新東同九西兩場補選，各個黨派、陣營已經磨拳擦掌，好似民建聯咁吖，有意派人出戰九西，皆因如果係連同有可能被DQ嘅劉小麗嘅議席出缺一齊補選，建制同民主派應各佔一席，只要建制協調推一人出戰就袋袋平安。
但協調呢家嘢，其實唔算易，民建聯等上位嘅第二梯隊爭崩頭，𠵱家黨內最高呼聲兩人分別係油尖旺區議會主席葉傲冬同深水埗區議員鄭泳舜，咁啱得咁蹺，兩位仁兄都有後台，前者係黨內元老兼行會成員葉國謙嘅姪，後者嘅爸爸鄭錦鐘可算「公職王」，係保良局前主席。
咁本身係該黨九龍西立法會議員蔣麗芸，撐邊個好？曾經多次對特首梁振英流露傾慕之情嘅元秋，呢次拒談情歸何處喎，佢叫大家唔好問佢支持邊個，因為兩個都喺地區做咗好多嘢，叫兩個拗手瓜，睇吓邊個爭取到較多地區兄弟支持喎！