35歲嘅公民黨黨魁楊岳橋（Alvin）宣佈「脫毒」，正式與同佢年紀差唔多、本身係事務律師嘅女朋友Eve訂婚，計劃明年底結婚。岳少話屆時未必會擺酒，「因為我個人低調，好怕擺酒，唔想鋪張」。至於會否旅行結婚，岳少話一切未有定案，因為呢排忙到癲。
極光下求婚得米
岳少同佢Eve嘅「紅娘」，大家都識㗎，佢就係公民黨立法會議員郭榮鏗。岳少話，喺一次郭榮鏗搞嘅業界活動中，認識到同樣都係來自法律界嘅Eve。岳少話喺上個月30日嘅凌晨，佢喺雪地跪求女朋友嫁畀佢，因為當時佢同女友去咗挪威同瑞典旅行，選擇喺睇北極光時下跪，最終得米，當時睇唔睇到北極光已經唔再重要。岳少話，女朋友係政治圈外人，作風低調，絕少現身於鏡頭之中，平日喺公開場合都係遠距離睇住佢。岳少又話，婚後唔打算生小朋友，想繼續享受二人世界。