有時真係唔好怪教育局局長吳克儉，佢真係好忙㗎，點會有時間喺立法會聽意見？當然不得不提，佢外遊嘅時間係比較多囉！
而噚日佢就冇飛去日本，但就殺入北區，同北區區議員會面，討論教育同地區事務等。其後則參觀青少年服務中心同小學，同青年交談，可惜政府隨後發送嘅新聞稿，無講青年人有乜問題問咗佢吖，唔知有冇叫佢推介日本好去處？吳得掂仲參觀上水香海正覺蓮社佛教正慧小學嘅「333小老師培訓計劃」北區培訓中心（圖），呢個計劃旨在幫助低收入家庭嘅小學生改善學業成績，並培養中學生成為小老師，增強自信同責任感。查實無論邊個做下屆特首，吳得掂相信冇得留低，餘下任期仲積極落區，唔通博絕處逢生？